డ‌బ్బు ఉన్న‌వారు ఏదీ చేసినా అదీ గొప్ప‌గానే ఉంటుంది. పేదవాడు తన తాహ‌తుకు మించి ఎంత చేసినా అది చిన్న‌గానే క‌న‌బ‌డుత‌ది. ఆంధ్రప్రదేశ్ కృష్టాజిల్లాలోని ఒక మారుమూల గ్రామంలోని పెళ్లి రిసెప్షన్కు వారి బంధువులు హెలికాప్టర్లో వ‌చ్చి అంద‌రిని ఆశ్చ‌ర్య‌ప‌రిచారు. కృష్ణా జిల్లాలోని మారుమూల పర్రచివర గ్రామంలో మంగళవారం జరిగిన వివాహ రిసెప్షన్కు గుజరాత్‌కి చెందిన ఒక బడా పారిశ్రామికవేత్త ప్రైవేట్‌ హెలికాప్టర్లో వచ్చారు. గుజరాత్‌కు చెందిన కేపీ గ్రూప్‌ సీఎండీ ఫరూక్‌ జి.పటేల్‌కు పర్రచివర గ్రామస్తుడైన బొండాడ రాఘవేంద్రరావు వ్యాపార భాగస్వామిగా ఉన్నారు. దీంతో తన మేనల్లుడు సందీప్‌, శరణ్యల వివాహ రిసెప్షన్కు ఫరూక్‌ను బొండాడ ఆహ్వానించారు. దీంతో ఫరూక్‌ తన కుటుంబ సభ్యులతో గుజరాత్‌ నుంచి గన్నవరం ఎయిర్‌పోర్టుకు వచ్చారు. అక్కడి నుంచి ప్రత్యేక హెలికాప్టర్లో పర్రచివర గ్రామానికి చేరుకుని, నూతన వధూవరులను ఆశీర్వదించారు. గ్రామానికి హెలికాఫ్టర్ రావడంతో పల్లె ప్రజలు ఆశ్చర్యంగా చూశారు. గన్నవరం నుంచి దగ్గర్లోనే ఉన్న పల్లెకు రోడ్డు ప్రయాణంలో రాకుండా హెలికాఫ్టర్‌లో రావడంతో అక్కడున్న వారంతా నోరెళ్లబెట్టారు. పెళ్లి రిసెప్షన్‌కే ప్రైవేటు హెలికాఫ్టర్‌లో వచ్చాడంటే, ఆ వ్యాపారికి ఎంత డబ్బుందో అని గ్రామస్తులు గుస‌గుస‌లాడుతున్నారు.
