ఘ‌రానా దొంగ‌ను ప‌ట్టించిన హైద‌రాబాద్ బిర్యానీ..

Share On

హైద‌రాబాద్ న‌గ‌రంలో అతి తెలివిగా దొంగ‌త‌నాలు చేస్తూ పోలీసులకు సవాల్ విసురుతున్న ఒక‌ ఘరానా దొంగను హైదరాబాద్ బిర్యానీ పట్టించింది. ఈ కేసుకు సంబంధించిన వివరాలను ఈస్ట్ జోన్ అదనపు డీసీపీ శ్రీనివాస్‌ రెడ్డి గురువారం (జూన్ 23) మలక్‌పేట పోలీస్ స్టేషన్‌లో మీడియా సమావేశంలో వెల్లడించారు. నిందితుడు తాళాలు వేసి ఉన్న ఇళ్లను టార్గెట్‌గా చేసుకొని, తాళాలు పగులగొట్టి విలువైన నగలు, నగదు దోచుకెళ్లేవాడని ఆయన తెలిపారు. సయ్యద్‌ ఇఫ్తేకారుద్దీన్‌ అనే వ్యక్తి నగరంలో కారు మెకానిక్‌గా పనిచేస్తూ మలక్‌పేట పరిధిలోని వెంకటాద్రినగర్‌ కాలనీలో నివాసం ఉంటున్నారు. మే 14న ఆయన తన ఇంటికి తాళం వేసి నగరంలోని తన మామ ఇంటికి వెళ్లారు. తిరిగొచ్చేసరికి ఇంటి తాళాలు పగిలి ఉన్నాయి. ఇంట్లో దొంగతనం జరిగినట్లు గుర్తించి మలక్‌పేట పోలీసులను ఆశ్రయించారు.

ఘటనపై కేసు నమోదు చేసుకున్న పోలీసులు.. దర్యాప్తు ప్రారంభించారు. ఘటనా స్థలంలో ఎలాంటి ఆధారాలు లభించకపోవడంతో చోరీ జరిగిన ఇంటి సమీపంలో నమోదైన మొబైల్‌ కాల్‌ డేటాను సేకరించారు. ఆ వివరాల ఆధారంగా కర్ణాటకకు చెందిన ఒక‌ వ్యక్తిని అనుమానించారు. మరింత లోతుగా దర్యాప్తు చేయగా.. పోలీసుల అనుమానం నిజమే అయ్యింది. కర్ణాటకలోని మైసూర్‌ హలే కేసరే ప్రాంతానికి చెందిన సయ్యద్‌ ఇజాజ్‌ అలియాస్‌ ఇమ్రాన్‌ (27) కొంత కాలంగా హైదరాబాద్ నగరంలో దొంగతనాలకు పాల్పడుతున్నట్లు పోలీసులు గుర్తించారు. తాళం వేసిన ఇళ్లను గుర్తించి, తాళం పగులగొట్టి సొమ్ము దోచుకొని పారిపోతాడని పోలీసుల దర్యాప్తులో వెల్లడైంది. దొంగతనం చేసి తిరిగి వెళ్లిపోయే సమయంలో అతడు చేసే చిన్న పని నిందితుడిని పట్టించింది.

ఇమ్రాన్ తాను దోచుకున్న నగలు, నగదుతో తిరిగి వెళ్లే సమయంలో అతడికి ఇష్టమైన హైదరాబాద్‌ బిర్యానీని ఆరగించడం అలవాటు. తరచూ మలక్‌పేటలోని సోహైల్‌ హోటల్‌ నుంచి జొమాటో ద్వారా మెహదీపట్నంలోని ప్రైవేట్ ట్రావెల్స్‌ కార్యాలయానికి బిర్యానీ తెప్పించుకునేవాడు. ఆ ట్రావెల్స్‌ నుంచి బెంగళూరుకు చేరుకునేలా ఏర్పాట్లు చేసుకునేవాడు. ఇందుకోసం లావాదేవీలు మొబైల్‌ నంబర్‌ ద్వారా నిర్వహించినట్లు గుర్తించి, వివరాలు సేకరించారు. కాల్‌డేటా ఆధారంగా మలక్‌పేట క్రైం ఇన్‌స్పెక్టర్‌ నానునాయక్‌తో కూడిన పోలీసుల బృందం బెంగళూరు వెళ్లి నిందితుడు సయ్యద్‌ ఇజాజ్‌‌ను పట్టుకున్నారు. ఇజాజ్ వద్ద నుంచి రూ.2.50 లక్షల నగదు, 85 గ్రాముల బంగారు నగలను పోలీసులు స్వాధీనం చేసుకున్నారు. భాగ్యనగరంలో జరిగిన 9 కేసుల్లో నిందితుడికి ప్రమేయం ఉన్నట్లు పోలీసులు గుర్తించారు. ప్రస్తుతం పోలీసులు అతడిని అదుపులోకి తీసుకొని విచారిస్తున్నారు.


Share On

Recommended For You

Leave a Reply

Your email address will not be published. Required fields are marked *

English English Hindi Hindi Telugu Telugu