హైదరాబాద్: ప్రేమ వ్యవహారం విఫలమై, తనను దూరం పెడుతున్న ప్రియుడికి గుణపాఠం చెప్పాలనుకున్న ఓ యువతి ఏకంగా పోలీసుల పేరుతో నకిలీ నోటీసు సృష్టించి చిక్కుల్లో పడింది. కూకట్పల్లికి చెందిన తరుణేశ్వర్ వీరంకి (24) అనే యువకుడు గత ఐదేళ్లుగా ఓ యువతిని ప్రేమించాడు. అయితే, గత ఏడాది కాలంగా ఆమెను కలవకుండా తప్పించుకు తిరుగుతూ, ఫోన్లో బ్లాక్ చేసి అన్ని రకాల సంప్రదింపులను నిలిపివేశాడు.దీనిని జీర్ణించుకోలేని ఆ యువతి, అతడిని భయపెట్టి దారికి తెచ్చుకోవాలని నిర్ణయించుకుంది. ఇందులో భాగంగా 'హైదరాబాద్ షీ టీమ్' (SHE Team) నుండి వచ్చినట్లుగా ఒక నకిలీ నోటీసును తయారు చేసి అతడి వాట్సాప్కు పంపింది. ఆ నోటీసు చూసి తీవ్ర భయాందోళనకు గురైన తరుణేశ్వర్, నేరుగా షీ టీమ్ పోలీసులను ఆశ్రయించాడు.అయితే, ఆ నోటీసును పరిశీలించిన పోలీసులు అది నకిలీదని స్పష్టం చేశారు. దీంతో ఆగ్రహానికి గురైన బాధితుడు నేరుగా సైఫాబాద్ పోలీస్ స్టేషన్కు వెళ్లి తన మాజీ ప్రియురాలిపై ఫిర్యాదు చేశాడు.పోలీసుల విచారణలో ఆ యువతి అసలు నిజాన్ని ఒప్పుకుంది. తనను దూరం పెడుతున్న ప్రియుడిని భయపెట్టేందుకే 'చాట్జీపీటీ' (ChatGPT) సహాయంతో ఆ నకిలీ నోటీసును రూపొందించినట్లు తెలిపింది. ఇందుకు హరి అనే మరో వ్యక్తి కూడా తనకు సహకరించినట్లు వెల్లడించింది. ఈ ఘటనపై పోలీసులు భారతీయ న్యాయ సంహిత (BNS) సెక్షన్లు 204, 319(2), 336(3), 340(2), 35(2) మరియు ఐటీ చట్టంలోని సంబంధిత సెక్షన్ల కింద ఎఫ్ఐఆర్ (FIR) నమోదు చేసి దర్యాప్తు చేస్తున్నారు
తెలంగాణ
ప్రియుడు బ్లాక్ చేశాడని 'చాట్జీపీటీ' సాయంతో నకిలీ నోటీసు
క్రెడిట్: విక్రమ్ శ్రీరాముల
© ముందడుగు. అనుమతి లేకుండా ఈ కథనాన్ని పునఃప్రచురించరాదు.
కామెంట్లు (0)
కామెంట్ చేయడానికి లాగిన్ అవ్వండి
లాగిన్ఇంకా కామెంట్లు లేవు. మొదటి వ్యాఖ్య మీరే రాయండి!