జైళ్లలోని ఖైదీలకు విద్యావకాశాలు కల్పించడం, వారి పునరావాసం మరియు జీవితాల్లో సానుకూల మార్పు తీసుకురావడమే లక్ష్యంగా తెలంగాణ జైళ్ల శాఖ, తెలంగాణ ఓపెన్ స్కూల్ సొసైటీ సహకారంతో ఖైదీల కోసం ఓపెన్ స్కూలింగ్ కార్యక్రమాన్ని ప్రారంభించింది. ఈ కార్యక్రమాన్ని తెలంగాణ ప్రభుత్వ విద్యాశాఖ ప్రిన్సిపల్ సెక్రటరీ డాక్టర్ యోగితా రాణా ప్రారంభించగా, తెలంగాణ జైళ్ల శాఖ డీజీ డాక్టర్ సౌమ్య మిశ్రా ఇత‌ర‌ ఉన్నతాధికారులు పాల్గొన్నారు.

డాక్టర్ యోగితా రాణా మాట్లాడుతూ, మానవ జీవితంలో విద్య యొక్క ప్రాముఖ్యతను, శక్తిని వివరించారు. విద్య అనేది కేవలం జ్ఞానాన్ని, విద్యార్హతలను మాత్రమే కాకుండా ఆత్మవిశ్వాసం, ఆత్మగౌరవం మరియు జీవితంలోని సవాళ్లను ఎదుర్కొనే ధైర్యాన్ని కూడా అందిస్తుందని తెలిపారు. దీపావళి పండుగను ప్రస్తావిస్తూ, దీపావళి పండుగ చీకటిని తొలగించి మన ఇళ్లలో వెలుగులు నింపినట్లే, విద్య అజ్ఞానమనే చీకటిని తొలగించి మన జీవితాల్లో జ్ఞానం, ఆత్మవిశ్వాసం మరియు ఆశాజ్యోతులను వెలిగిస్తుందని పేర్కొన్నారు. ఖైదీలు ఈ అవకాశాన్ని సద్వినియోగం చేసుకొని తమ చదువును కొనసాగిస్తూ ఉజ్వల భవిష్యత్తు వైపు అడుగులు వేయాలని ఆమె పిలుపునిచ్చారు.


డాక్టర్ సౌమ్య మిశ్రా మాట్లాడుతూ, తెలంగాణ జైళ్ల శాఖ లక్ష్యం కేవలం ఖైదీలను సురక్షితంగా ఉంచడం, భద్రత కల్పించడం మాత్రమే కాదని, జైళ్లను సంస్కరణ, పునరావాసం, విద్య మరియు నైపుణ్యాభివృద్ధి కేంద్రాలుగా తీర్చిదిద్దడమే తమ ప్రధాన లక్ష్యమని తెలిపారు. విద్య అనేది ఖైదీల జీవితాల్లో సానుకూల మార్పు తీసుకురావడానికి అత్యంత ప్రభావవంతమైన సాధనమని, తద్వారా వారు శిక్షాకాలం అనంతరం సమాజంలో బాధ్యతాయుతమైన పౌరులుగా తిరిగి జీవించేందుకు అవకాశం కలుగుతుందని పేర్కొన్నారు. తెలంగాణ ఓపెన్ స్కూల్ సొసైటీ డైరెక్టర్ కె. లింగయ్య మాట్లాడుతూ, జైళ్ల శాఖకు TOSS తరఫున పూర్తి విద్యా సహకారం అందిస్తామని తెలిపారు. 

ప్రస్తుత విద్యా సంవత్సరానికి సంబంధించి 70 మంది ఖైదీలు పదవ తరగతి, 15 మంది ఖైదీలు ఇంటర్మీడియట్ కోర్సుల్లో చేరేందుకు ఆసక్తి వ్యక్తం చేశారు. మొత్తం 85 మంది ఖైదీలు ఇప్పటికే ఈ కార్యక్రమంలో చేరేందుకు ముందుకు రావడం సంతోషకరమని డీజీ తెలిపారు. ఈ కార్యక్రమంలో భాగంగా తెలంగాణ ఓపెన్ స్కూల్ సొసైటీ సమాచార బ్రోచర్లను అధికారికంగా విడుదల చేశారు. జైళ్ల శాఖ ఐజీ ఎన్. మురళీ బాబు, డిఐజీలు డాక్టర్ డి. శ్రీనివాస్, ఎం. సంపత్, చంచ‌ల్‌గూడ జైలు సూపరింటెండెంట్ ఎన్. శివకుమార్ గౌడ్, సంగారెడ్డి సూపరింటెండెంట్ సంతోష్ కుమార్ రాయ్, చెర్లపల్లి సూపరింటెండెంట్ జి. ప్రమోద్, డిప్యూటీ డైరెక్టర్ ఆఫ్ ఇండస్ట్రీస్ ఎస్.ఎం. ఖలీద్ అక్తర్ పాల్గొన్నారు.