కాంగ్రెస్ అగ్రనేత, ఎంపీ రాహుల్‌గాంధీ తన తల్లి సోనియాగాంధీ ధైర్యసాహసాలపై ఆసక్తికర వ్యాఖ్యలు చేశారు. సోనియాగాంధీ ఆత్మకథ ‘Belonging: A Journey of Love’ పుస్తక ఆవిష్కరణ కార్యక్రమంలో పాల్గొన్న ఆయన.. తన తల్లి నాలుగుసార్లు క్యాన్సర్‌ను జయించారని వెల్లడించారు.


తన జీవితంలో తల్లి భయపడటం ఒక్కసారి కూడా చూడలేదని, ఆమెకు ఎంతో ధైర్యం ఉందని రాహుల్‌గాంధీ పేర్కొన్నారు. దశాబ్దాలుగా ఎదుర్కొన్న వ్యక్తిగత ఆరోగ్య సమస్యలను సోనియాగాంధీ తన పుస్తకంలో పెద్దగా ప్రస్తావించలేదని, అయితే ఆమె ఎదుర్కొన్న సవాళ్లు ఎంతో గొప్పవని తెలిపారు. తన తల్లిదండ్రులు సోదరి ప్రియాంకాగాంధీని ఎంతో ప్రేమించేవారని, రాజీవ్‌గాంధీ ఆమెను చూసి ఎంత గర్వపడేవారో మాటల్లో చెప్పలేనని రాహుల్‌గాంధీ భావోద్వేగంగా వ్యాఖ్యానించారు.


మరోవైపు, 1991లో మాజీ ప్రధాని రాజీవ్‌గాంధీ హత్య అనంతరం కుటుంబం ఎదుర్కొన్న పరిస్థితులను సోనియాగాంధీ ఈ సందర్భంగా గుర్తుచేసుకున్నారు. భద్రతా కారణాల దృష్ట్యా రాహుల్‌గాంధీ హార్వర్డ్‌ విశ్వవిద్యాలయం నుంచి మరో అమెరికన్‌ కళాశాలకు మారాల్సి వచ్చిందని తెలిపారు. రాహుల్‌ భద్రతకు సంబంధించి హార్వర్డ్‌లో చదువు కొనసాగించడం ప్రమాదకరమని భద్రతా సిబ్బంది సూచించడంతో, ఆయనను మరో కళాశాలలో నకిలీ గుర్తింపుతో చేర్పించాల్సి వచ్చిందని సోనియాగాంధీ వివరించారు.